【Now財經台】阿里影業(01060)計劃改名「大麥娛樂控股」，希望進一步提升全娛樂生態嘅市場知名度，重塑品牌形象，希望未來發展更多元化嘅業務。受消息刺激，阿里影業股價今日(21日)愈升愈有，一度勁升逾24%，高見0.76元。被阿里影業收購嘅大麥對公司嘅收入貢獻持續增加，改名後繼續側重大麥係咪合理？
元宇證券基金投資總監林嘉麒認為，阿里影業嘅票務及影視製作協同效應大，所以公司進行業務轉型係好合理，加上集團去年院線票房高，整體收入理想，都令投資者對公司有一定信心。
相對於同業貓眼娛樂(01896)，KK認為，阿里影業有自己嘅影視製作及院線，同大麥crossover合作，甚至可以推出更多優惠，都會提升大麥嘅潛在發展空間，帶嚟更多協同效應，阿里影業未來發展都值得憧憬。
