【Now財經台】截至早上11時止，1小時內《彭博》用戶搜尋量最多港股，依次為吉利汽車(00175)、領展房產基金(00823)、地平線機器人(09660)、衛龍美味(09985)及泡泡瑪特(09992)。
極氪(Zeekr)喺美國上市唔夠1年就獲吉利提出私有化，吉利控股集團董事長李書福指，係「回歸一個吉利」，中金亦睇好私有化會緩解市場對吉利旗下品牌資源分配嘅質疑，利好中長線發展，極氪股價由去年5月9日上市至今累升近20%，但股價大幅跑輸吉利，上市約半年後，仍要母企吉利斥資8億美元增持，變相向公司「泵水」，但去年底仍未能「止血」，點睇呢單私有化？
紅蟻資本投資總監李澤銘指，呢個消息係令人意外，因為極氪股價表現唔算差，電動車(EV)行情中規中矩，加上毛利率逐步提升，係純電動車行業中最高，更有機會喺年底實現盈利，理論上極氪可以繼續喺美國市場發展，相信今次提出私有化，主要係吉利擔心中美貿易磨擦蔓延會受到影響。
此外，雖然吉利估值升咗唔少，但跟同業比較仍有一定差距，而私有化會對吉利估值有幫助，加上喺極氪有錢賺之前私有化，可以用較低價錢私有化，所以股價今日(8日)反應正面。
