【Now財經台】截至早上11時止，1小時內《彭博》用戶關注度上升最多股份，依次為國泰君安國際(01788)、農夫山泉(09633)、華虹半導體(01347)、吉利汽車(00175)及中國宏橋(01378)。今日(12日)上榜股份主題分散，多隻連日上榜嘅人工智能(AI)概念股，今日全部冇影。
摩根士丹利最新上調華虹半導體目標價，由60元調高至88元，評級由「減持」上調至「與大市同步」，值得留意係，目標價低過現價，但又上調評級，點睇呢個情況？
方德證券分析師李浩然指，單看華虹市盈率(PE)已去到幾百倍，的確係幾貴，但華虹本身定位係成熟製程，提供晶元代工，在中美科技博弈中較少受制裁及限制，所以係一個相對安全嘅領域。
Eric續指，成熟製程主要應用於汽車、工業控制、電源管理等，跟國產替代有關聯性，內地車廠及電廠為咗自身供應鏈嘅安全，將海外代工廠轉返本土，都係華虹PE持續高企嘅原因，但短期而言，佢對華虹PE咁高仍有保留。
