【信報財經新聞】噚晚美股表現反覆，美伊戰爭仍未結束，但市場憧憬美伊雙方有機會展開談判，有助恢復波斯灣地區石油出口，紐約期油幾乎將星期一嘅所有升幅蒸發，一度插水近兩成，低見76.83元，不過戰事尚未真正結束，最終紐約期油反彈至83.45美元收市，目前仍於80美元之上徘徊。美股隔晚就跟住個油價上落，道指高開30點後一度轉跌，最多挫296點，隨後掉頭抽高479點，高見48220，標指曾反覆倒升0.72%，納指則一度回升0.93%。不過伊朗表示仍要抗戰到底，美市收市，道指轉跌34點或0.07%，報47706；標指跌14點或0.21%，報6781；納指蒸發早段升幅，跌0.01%，報22697。
睇返個NQ噚日都到晒位，守住噚日個分水嶺25490就繼續反彈，不過上到25150-25200呢個阻力位就掉頭回落，但最終都仲守住個分水嶺，家下企返喺25000水平。今日NQ個分水嶺喺25000，下方首個支持喺24925-24900，下一個支持喺24800-24825，盤中較大支持係24700-24725，盤中最大支持係24500；至於上方首個阻力仍然係25150-25200，25350-25400仲喺短期最大阻力。個NQ唔企返穩個25500，仲未扭轉到弱勢。
個股方面，ONDS又差不多到短炒啲食糊位10.3至10.5，炒住1元波幅，話多唔多，話少又唔算，都有10%水位畀你短炒上落。公司今年個收入指引只係符合預期，冇特別比到市場驚喜，加上解禁，一路守到8.8樓上算係咁。公司成功合併mistral，令到ONDS可以直接以主要承包商身份參與美國陸軍及特種作戰合約項目，長遠利好。消化咗近期啲沽壓，其實阿Man想睇高少少，企得穩10元，睇下有冇去埋較大嘅阻力位11.4至11.6。
至於港股噚晚跟住個美股反覆，夜期盤中一度抽高至26185，但尾市又跟美股腳軟落返去二萬六樓下收市。恒生指數今早高開152點，最多曾升189點至26149，其後一度轉跌9點，低見25950，半日升21點或0.08%，報25981，未能企穩26000關；國企指數升14點或0.16%，報8724；科指升13點或0.26%，報5073。半日成交1474億元，買賣兩閒，好友見唔企得穩26000又唔想博命，淡友怕兩會閉幕有乜嘢消息挾淡倉，亦唔夠膽出手。
今早表現較突出嘅係汽車股，蔚來(09866)公布業績後，股價急升16.1%，帶動其他汽車股炒高，比亞迪(01211)早段逆市跌，半日倒升1.7%；吉利(00175)升8.5%係表現最好藍籌股；小鵬(09868)跟理想汽車(02015)分別升5.6%及1.3%。績後炒高嘅仲有寧德時代(03750)，噚日急升逾一成，今日再升8.3%。阿Man就偏愛比亞迪同小鵬，前者係行業龍頭，後者新能源車同機械人雙重概念。比亞迪呢啲位上車，博佢企穩97元，再挑戰紅底，要扭轉弱勢，要企返上去105元，至於下方支持喺90至92元，望個市喺25000條250日線見咗底，咁呢啲優質股，應該都唔會再穿底。小鵬就有小小向上突破，呢啲位追貨，用返個70做防守，博佢企穩75元再上，不過要扭轉跌勢，至少要企穩85元先有得傾。
問題係依家個市見底未，純技術走勢睇，恒指兩次落到250日線，大約係24950至25000都守得到，暫時反彈返上嚟，叫做先企返條10日線約25850，係有初步見底跡象。只不過咁，睇成交就仍然動力不足，但優質股係時候開始分段儲貨，最多預佢有乜嘢特發事件，再穿一穿25000，去埋個24500-24800，做埋成個調整浪嘅波幅，見埋呢啲位，即日彈得返上去25000，咁個市見底機會就大。至於呢一浸反彈，上方阻力係條20日線，約26350，彈到呢個位企唔穩，再調頭穿返25800，咁就有機會再做多個底部出嚟。相反，彈到去26350頭也不回，再衝上50日線26530都企得穩，咁就確認完成調整，有機會再展開另一個新升浪。
麥狄文
(徐狄怡‧證監會持牌人)
