【Now財經台】截至早上11時止，1小時內《彭博》用戶搜尋量最多港股，依次為長和(00001)、農夫山泉(09633)、申洲國際(02313)、海底撈(06862)及華潤萬象生活(01209)。
內需股海底撈出咗業績，去年收入按年增長3%，全年多賺近5%，派息按年大增20%至50.7港仙，集團嘅加盟店業務開始上軌道，去年共有13家，呢瓣業務中長線可唔可以再推高股價？
資深證券分析師彭偉新指，加盟店有增長對海底撈嚟講一定係好事，因為以加盟店形式擴展網絡嘅成本相對低，整體營運風險亦較細，加上店舖翻枱率上升，有利營業收入增長，相比開設新店更慳成本，收入增長亦會加快，繼而改善盈利表現。至於股價喺收入持續增加，以及成本下降，短期有望再升。
