【Now財經台】有人工智能(AI)概念嘅美圖公司(01357)發盈喜，預期去年經調整淨利多賺50%至60%，估計最少多賺1倍，美圖股價今日(10日)一度升近11%，高見4.8元，愈來愈多行業受惠於AI應用，呢類股份選擇多咗，會唔會分薄流入美圖嘅資金？美圖股價前景又係點？
博威環球證券金融首席分析師聶振邦指，美圖以圖像為主業嘅競爭對手唔多，所以即使多咗企業受惠於AI，對美圖嘅影響有限，不過，如果美圖唔接入其他新業務，例如影像及電影等相關業務，美圖未來嘅市場份額就會受到威脅，所以市場對公司業務前景有一定憧憬。
聶Sir又話，美圖股價近期升到5元水平有回套壓力，1月底至今已累升近50%，有獲利盤出現都好正常，如果股價今個星期企唔穩4.8元，有貨嘅投資者可以考慮先離場，等股價落返4元至4.2元水平再吸納會比較安全。
