【Now財經台】比亞迪股份(01211)股價今日(6日)午後大幅抽高，尾市一度高見316.4元，大升近12%，旗下比亞迪電子(00285)尾市更一度飆20%，高見54元。比亞迪將會喺下周一(10日)舉行智能化戰略發布會，希望透過「天神之眼」提供高階智能駕駛，發布會係咪值得憧憬？比電爆上又係咩原因？
耀才證券研究部總監植耀輝指，比亞迪去年銷售理想，盈收仲好過Tesla，由於比亞迪智能化發展落後於同業，所以當比亞迪喺智能化方面有諗法時，市場都會睇得好正面，而投資者又會憧憬比亞迪嘅賣點多咗好咗，就會令股價向好。
比電方面，Stanley話，股價今日急升除咗受惠於為蘋果公司(Apple Inc.)產品組裝外，母公司喺人工智能(AI)方面有新概念搞作時，比電股價都會受惠，而北水今日蜂擁買入比電亦係另一個幕後推手。
