【Now財經台】截至早上11時止，1小時內《彭博》用戶搜尋量最多港股，依次為安踏體育(02020)、騰訊控股(00700)、國泰航空(00293)、信和置業(00083)及港鐵公司(00066)。
安踏出咗2024年第4季及全年銷售數字，上季主品牌及FILA齊錄高單位數增長，大行普遍認為主品牌表現收貨，FILA更加有驚喜。管理層話，「超級安踏」會成喺2025年焦點，但大行認為，內地經濟前景仍然唔明朗，對集團盈利睇法有分歧，今年體育用品股可唔可以受惠中央力谷內需？
椽盛資本投資總監曾永堅指，安踏旗下較高檔次嘅FILA錄高單位數增長，銷售好過預期，為市場帶嚟驚喜。除旅遊外，內地整體零售表現仍然疲弱，因為仍面對樓市、經濟前景不明朗等因素，所以市民喺非必需品方面嘅消費意欲唔大，但FILA銷售表現已非常難得。
佢又估計，內地經濟不明朗情況今年上半年仍會持續，加上未來出口表現或受特朗普(Donald Trump)上任後加關稅而惡化，所以市民仍唔願意買非必需品。至於體品企業銷售前景，高價或高檔次品牌或面對更大考驗。
股價方面，安踏股價依家喺74元水平有支持，今日即市低位77元，預測市盈率(PE)約15倍，喺估值唔平嘅情況下，股價要進一步反彈似乎有難度，佢估計，安踏後市會維持反覆上落格局。
