【Now財經台】美國國防部將騰訊控股(00700)及寧德時代等企業列入第1260H條，即跟中國軍隊協作公司名單中，騰訊好快就發聲明澄清，騰訊股價今朝(7日)低開7%，喺集團澄清後都冇乜起色。睇返曾經畀美國列入「黑名單」嘅中國移動(00941)及中海油(00883)，因為本身有「中特估」概念，股價喺2021年至2024年，連升4年，今次騰訊係咪都唔使擔心？
獨立股評人王榮昆指，中移動及中海油呢類公司嘅估值係跟返中國特色，亦派息高，單睇派息騰訊已經輸蝕。此外，騰訊同有中特估概念嘅中移動比較，依家外資持有中移動嘅比例最多只有10%至15%，但騰訊最大股東Prosus揸住26%，美國及全球其他投資者持有約30%，單計呢兩部分已經有約56%非中國持股者揸住騰訊，同中移動嘅股權架構好唔同，所以好難用中特估嘅玩法套喺騰訊身上。
