【Now財經台】周大福(01929)宣布，搵咗國際奢侈品牌LOEWE前高層范嘉碧(Gabriela Ferreira)做集團國際業務總經理，股價今日(4日)平開後，隨即向下，午後一度跌3%，低見6.08元，跌至4年低位，收市報6.14元，跌逾2%，全日成交金額逾6200萬元。
周大福今次搵到LVMH集團旗下品牌高層過檔，係咪可以為業務帶嚟新出路，成功捕捉到集團睇中嘅東南亞中產市場及當地經濟復甦動力，就要拭目以待。
周大福出完季績後，股價跌唔停，范嘉碧加盟消息刺激唔到股反彈，反而進一步向下，14天相對強弱指數(RSI)已跌到30嘅超賣水平，但值得留意係，之前RSI試過要跌到10樓以下先出現反彈，想撈底嘅投資者要睇路。
