【Now財經台】截至早上11時止，1小時內《彭博》用戶搜尋量最多港股，依次為永利澳門(01128)、周大福(01929)、安踏體育(02020)、中國銀河(06881)及紫金礦業(02899)。
賭股今早(14日)全線下跌，澳門昨日(13日)舉行行政長官選舉，唯一候選人岑浩輝當選，成為首位喺內地出世嘅澳門特首，佢話澳門未來發展會走多元化路線，市場解讀為唔再依賴賭業。賭股今日下跌，係咪擔心新特首上場政策有變，還是純粹跟大市跌？賭股月初曾經急升，係咁多板塊中最後一批上升嘅股份，賭股係咪已變成「藍燈籠」？
富昌證券聯席董事譚朗蔚指，龍頭金沙中國(01928)、銀河娛樂(00027)僅跌3%至4%，唔算跌好多，今日大市弱勢，加上「十一黃金周」賭收數據唔突出，撐唔起賭股股價，所以順勢跟大市回調。
佢又話，賭股冇基本因素可言，所以升勢唔會持續好耐，若投資者想喺牛市中趁低吸納，建議選擇有基本因素支持嘅板塊及股份。
