【Now財經台】截至早上11時止，過去1小時內《彭博》用戶搜尋量最多港股，依次為華虹半導體(01347)、安踏體育(02020)、新世界發展(00017)、美團(03690)及中廣核電力(01816)。
市傳台積電(TSMC)客戶基於市場需求增加而同意加價，人工智能(AI)浪潮進一步由憧憬演變成實際利好，甚至變現能力，市場憧憬產業鏈迎來超級周期，所以華虹產品亦有望加價，不過，現時華虹嘅技術水平跟同業仍相差好遠，加價能力係咪較弱？
富途證券首席分析師譚智樂認為，晶片股迎來超級周期，由於唔少科技公司打算興建科技中心，令高端晶片需求增加，令晶片企業有條件加價，不過，只限於運算力最強嘅晶片企業。佢又話，內地晶片企業要追落後，唔止係價格問題，更重要係要追趕外國嘅技術水平，不過，呢方面難度非常高，所以股價表現都相差好遠。
Arnold又指，短炒晶片股係幾穩陣，但潛在升幅可能有限，要完全追落後幾乎係無可能。
