【Now財經台】截至早上11時止，1小時內《彭博》用戶搜尋量最多港股，依次為新世界發展(00017)、中銀香港(02388)、中國海洋石油(00883)、萬科企業(02202)及中國石油股份(00857)。
新世界繼2003年後，再被踢出藍籌，股價暫時已連跌第4年，今年已累跌逾40%，市值僅166億元，新世界估值有冇機會修復？不過，睇返過去被踢出藍籌嘅股份，股價都會慢慢喺低位彈返上去，對新世界嚟講有冇參考價值？
富昌證券聯席董事譚朗蔚指，新世界之前發咗盈警，加上帳目問題，股價就跌咗落去，其後股價因港銀跟外圍減息出現反彈，但近日港股市況轉差，新世界股價反覆，如果想走勢好轉，除咗公司因素外，最主要都係要睇樓市，要等住宅、商舖、辦公室等都出現復甦勢頭，新世界整體估值才有望回升。
Stevan又指，新世界被踢出藍籌後，短線會因被動基金沽貨而影響股價，但長線都未必可以跑返贏，因為近年恒指整體呈向下趨勢，剔出後嘅股份同指數唔再相關，唔需要跟大市行，變相表現好似好咗，但恒指近期有好轉跡象，被剔出嘅股份後市表現唔會特別好。
