【Now財經台】澳門整體賭業表現仍未回復至疫前水平，復甦步伐較慢，其實賭股走勢已反映咗業務表現，其中，銀河娛樂(00027)及金沙中國(01928)股價今年都要跌，反觀美高梅中國(02282)股價升勢最凌厲。
銀娛上季非博彩業務收益僅佔整體經調整EBITDA (撇除利息、稅項、折舊及攤銷前盈利)約15%，集團旗下嘉佩樂酒店及度假村將於明年中開幕，雖然銀娛財務狀況及淨現金均勝同業，但派息唔及「中特估」概念股，業務復甦又慢過其他博企，銀娛業務及股價前景如何？
信達國際研究部董事趙晞文認為，雖然銀娛有新酒店及度假村落成，但仍要視乎係咪符合消費者口味及定價，相信短期對集團幫助唔大，一般而言，新項目要6至9個月後先會錄得收益，唔適宜過分聚焦新業務，反而應該將焦點放喺下半年業績。
Hayman又指，如果將銀娛派息同「中特估」概念股比較唔係咁恰當，但無可否認銀娛係輸蝕，睇返中長期估值，銀娛企業價值(EV)對EBITDA約10倍，係5年以來最低，股價又欠催化劑，不過，夏季係旅遊旺季，或者可以憧憬集團旗下路氹非博彩項目表現有改善，但仍需要時間驗證。
