【Now財經台】茶百道(02555)今日(23日)首日掛牌，雖然係「新股集資王」，但集資只有近26億元，昨日(22日)暗盤收市價更比招股價低逾10%。茶百道係內地現製茶飲店第3大企業，經營模式與已申請上市嘅蜜雪冰城相若。面對內地餐飲業內捲化、消費降級及平價取勝，呢隻新股王前景都唔太樂觀？
高富金融集團投資總監梁偉民認為，市場本身競爭好大，加上消費市場有轉弱嘅情況，所以對茶飲銷售就會有負面影響。但更重要係經營模式，大部分呢類公司係靠授出專利予其他人開店，收入盈利好靠開店數目。上市前一般都會有亢奮性開店擴張，帶動收入明顯上升，但上市後分店高速擴張一般都會見頂、甚至回落，亦可能被其他競爭對手取代。佢提醒要小心呢種經營模式，盈利未必可以持續。
