【Now財經台】截至早上11時止，1小時內《彭博》用戶搜尋量最多港股，依次為商湯(00020)、快手(01024)、香港交易所(00388)、茶百道(02555)及中國宏橋(01378)。
商湯發布人工智能(AI)大模型「日日新5.0」版本，管理層表示新版AI於知識、推理、數學、代碼場景拍得住GPT-4 Turbo，客觀評測超越GPT-4，今日憑憧憬炒上最多升超過30%，而且中途停牌，收復50天線，不過內地多間科企都話推大模型，競爭咁大，變現能力又係點？係唔係真係賺到錢？
資深證券分析師彭偉新指，投資者揀AI有關嘅公司時，都主要睇公司有冇變現能力，否則市場短炒幾日後，股價可能會跌得更勁，所以要留意商湯今日(24日)停牌後有冇特別消息公布。另外，即使商湯推出嘅大模型可以同海外公司比拼，但海外公司亦唔係賺好多錢，加上競爭激烈，令市場對商湯變現能力有懷疑，今日嘅升勢好可能只係炒作消息，長遠都要睇公司變現能力。
