【Now財經台】相隔唔夠1年，內地雲服務商再爆減價戰。阿里巴巴(09988)旗下阿里雲昨日(29日)突然宣布減價，全線核心產品平均減價逾20%，最多更勁減55%，係歷來最大減幅，集團指，減價係希望釋放內地市場潛力，令雲計算進一步普及，其後京東集團(09618)亦宣布「參戰」，但減幅冇咁大，只係較特定服務商平10%。騰訊控股(00700)、百度集團(09888)等會唔會跟隊減價？新一輪減價戰會對呢啲公司嘅盈利帶嚟幾大壓力？
博威環球證券金融首席分析師聶振邦指，騰訊及百度等好大機會跟阿里減價，但減幅未必咁進取，佢又估計，呢輪減價潮會持續一段時間，因為內地經濟仍有好大不確定性，雲服務商要以低價吸引更多人用佢哋嘅服務，雖然減價戰會為利潤帶嚟挑戰，但亦有助提升銷量，因此，預期減價戰未必會對第1季業績有太大影響。
