【Now財經台】截至上午10時45分止，1小時內《彭博》用戶搜尋量最多港股，依次為中國海外發展(00688)、快手(01024)、周大福(01929)、美團(03690)、建設銀行(00939)。
人民銀行昨日(20日)下調5年期以上貸款市場報價利率(LPR)後，對內銀股利好及利淡參半，利淡係擔心淨息差及銀行利潤，高盛指，下調5年期以上LPR 25點子，內銀今年純利將減少最多6.5%，利好作用就係，可以改善房貸及政府債償還能力，減低系統性風險，滙豐證券就話，有助內銀資產質素改善。
資深證券分析師彭偉新表示，內銀一向估值低，例如建行息率高，市盈率(PE)就非常低，反映個別內銀股估值被嚴重低估，佢又話，如果內銀股嘅生意維持到，息率就會keep到，唔會因為息差及收入下跌派唔到息，所以內銀股短線會有一個唔錯嘅上升空間。
彭偉新續稱，若人行未來再減息，令息差進一步收窄，到時先會反映喺股價上，現階段嘅影響相對輕微。
