【Now財經台】截至早上11時止，1小時內《彭博》搜尋量最多港股，龍湖集團(00960)、百威亞太(01876)、萬科企業(02202)、希慎興業(00014)及中國海外發展(00688)。
中央經濟工作會議定調同中央政治局會議差唔多，繼續推動房地產市場止跌回穩，內房股今日(13日)跌幅顯著，其中，龍湖及中海外更打入藍籌5大跌幅榜，係咪市場之前對中經會期望太大？
大華繼顯執行董事梁偉源指，每年會議政策都只係定出一啲方向性目標，唔會講到執行細節，但每次開會前都一定有炒作，今次都唔例外，其實中央今年以來已推出唔少同房地產相關嘅政策，只係今次冇更新嘅政策，導致市場咁失望。
佢又話，雖然內房股股價跌咗落嚟，但唔需要睇得太悲觀，因為中央會持續推出政策，加上10月及11月一手銷售已有改善咗，相信明年第1季按年銷售將錄得顯著升幅，屆時市場氣氛將會好轉。
