【Now財經台】截至早上11時止，1小時內《彭博》用戶關注度上升最多港股，依次為新秀麗(01910)、安踏體育(02020)、萬科企業(02202)、中國海洋石油(00883)及中遠海控(01919)。
安踏股價今早(4日)創52周新低，曾低見68元，花旗最新指，安踏今年面對嘅行業競爭加劇，預期EBIT利潤率顯著受壓，但仍維持107.8元目標價。國際品牌如Nike表現都唔好，行多品牌策略嘅安踏，銷售前景係咪都好難樂觀？
英皇資本財富管理方案研究總監陳錦興認為，內地復甦差過預期，消費動力一直出唔到嚟，對品牌消費如體育用品嘅影響會較大。事實上，過去幾隻較強勢嘅內地體育用品股，股價過去1年持續受壓，估值不斷被下調。
佢相信，安踏估值仍有下調空間，而股價已跌穿2023年底部，2024年初或要再試新低，絕對唔係一個好現象。由於市場對安踏2023年業績睇得比較保守，加上2024年盈利及收入指引有轉保守嘅壓力，投資者都會沽定先，所以後市仍會睇得比較淡。
