【Now財經台】截至早上11時止，1小時內《彭博》用戶關注度上升最多港股，依次為中國海洋石油(00883)、龍湖集團(00960)、中國石油化工股份(00386)、中國移動(00941)、中國神華(01088)。
內房股繼續有唔錯反彈，摩通大根指，內房股過去1星期跑贏大市，其中，中國海外發展(00688)及華潤置地(01109)表現最好，摩通認為，近日嘅強勢係單靠資金流入落後股份推動，A股唔會跟升，4月樓市數據仍然令人失望；不過，瑞銀睇好內房，認為已經準備好復甦，3年來壓抑嘅需求會捲土重來，係唔係意味著基本面確實開始好轉？
大華繼顯執行董事梁偉源指，內房最壞情況已經過去，前景慢慢好轉，包括銷售及房價都會穩定復甦，較高危嘅民企債務風險都已經「爆雷」，但復甦速度唔會咁快，即使有政策支持，樓價仍缺乏動力，銷售情況亦唔太理想，以往大家憧憬「五一黃金周」改善銷售，但今年就有所保留，始終暫時未見市場有強勁嘅復甦。
