【Now財經台】新世界地產(00017)係今日表現最差藍籌，今朝高開後，一度高見20.85元，但好快就掉頭向下，其後《施政報告》未有宣布「減辣」，股價午後跌勢加劇，再創超過6年新低，低見18.8元，收市跌逾7.7%，報18.82元。
本港樓市持續受壓，加上冇利好樓市政策，新世界股價今個月累跌15%，睇返技術走勢，新世界股價連日受制於10天線，今日收市更失守20元水平，14天RSI(相對強弱指數)最新喺22水平，逼近嚴重超賣水平，反映股價短期極度弱勢。
不過，新世界前景未必好似想像中咁差，據《彭博》最新分析認為，即使樓市疲弱，新世界截至明年6月底止財年，物業發展業務收入頗為理想，其中包括柏傲莊1及2期的入帳帶動，預期全年有望超過250億元，按年大增3倍。
