【Now財經台】截至早上11時止，1小時內《彭博》用戶關注度上升最多首5隻港股，依次為銀河娛樂(00027)、中信銀行(00998)、金沙中國(01928)、禹洲集團(01628)、新世界發展(00017)。
賭股持續弱勢，金沙股價暫時4連跌，銀娛更連跌第5日，今朝輕微低開後，半日最多跌6%至34.5元。資深證券分析師彭偉新分析指，銀娛股價或要回落至2022年3月及11月嘅低位附近先會喘定，若以當年3月約33.45元水平估算，現價仲有約1.4元嘅下跌空間，揸住銀娛嘅股民可能要捱多一浸跌浪。
Castor又認為，澳門政府似乎唔睇好今年旅遊業嘅增長，雖然今朝澳門首季博彩收入按年增長65%，相當於2019年同期嘅75%，當地旅遊業數據亦差唔多恢復至疫情前水平，但當局未有因此上調全年賭收預測，相信今年「五一黃金周」嘅憧憬唔會炒到博彩板塊。
此外，市傳澳門博彩信貸法8月起生效，Castor話，市場或憂慮法例會限制賭企收入，令唔少之前部署咗賭股嘅投資者今日進一步拋售手上持股，相信賭股短期會繼續跑輸大市。
