【Now財經台】華虹半導體(01347)今朝低開近5%後，股價隨即插水式下跌，一度重挫逾18%，低見23.2元，華虹股價暫時已連跌第5個交易日，累跌逾20%，插穿250天線。
據美國科技新聞平台《The Information》引述知情人士報道，美國商務部正考慮禁止美國公司向中國企業出售先進嘅晶片製造設備，除咗華虹，長鑫存儲、長江存儲呢啲內地公司都會受影響，不過，官方仲未確認有關消息。
若美國加強制裁，有機會影響華虹業務前景，公司星期四就會派季度成績表，睇下到時會唔會回應事件，但股價喺咁跌，似乎反映市場對華虹嘅憂慮不斷升温。
