【Now財經台】華虹半導體(01347)、中芯國際(00981)周二(6日)放榜後齊齊捱沽，不過，今日(8日)跟隨外圍晶片股炒起，華虹股價逆市飆10%，中芯亦升2%。
耀才證券研究部總監植耀輝提醒，呢兩隻晶片股基本面仍跑輸外圍。去年第4季，華虹毛利率按季顯著收窄12個百分點至4%，期內，中芯毛利率亦進一步跌至16.4%，遠遜於業內龍頭台積電(TSM)嘅53%。Stanley預期，未來1年，內地晶片製造商除面對庫存囤積問題，又要燒錢追趕技術進度，加劇成本壓力，盈利能力或要繼續倒退。
此外，市傳中芯會為華為生產5納米晶片，較現時最先進嘅3納米僅落後一代。Stanley話，雖然中芯不計成本咁提升先進製程(advanced process)技術，但其代工晶片貴TSM嘅7納米及5納米晶片40%至50%，良率卻不足TSM嘅三分之一。佢續指，中芯依家只得1條5納米晶片生產線，產能相對受限，短期難以追上先進製程業務佔60%以上嘅TSM。
