【now.com財經】近期新股暗盤及首日掛牌收市狂飆情況明顯少咗，唔少新股暗盤更「一衝即散」，正當新股表現似乎要「唞一唞」之際，有原本今日(17日)首掛嘅新股突然臨門「縮沙」，煞停上市，唔知會唔會為新股市場造成一股「低氣壓」。
原定今日首掛嘅新股海西新藥(02637)昨晚(16日)突然出通告，指要押後上市，今次係新股市場罕見喺完成暗盤交易後，突煞停上市嘅事件，亦係港交所(00388)推出電子IPO平台FINI近2年以嚟，第1次有新股以「需要額外時間處理」為理由推遲上市。
值得留意係，海西新藥嘅通告冇交代係咪順延至下周一(20日)掛牌，只係話「董事會將在切實可行情況下盡快向市場提供最新資料。」
對上一次完成暗盤交易後突叫停上市，已經數到2022年嘅百德醫療，當時公司話「需要更多時間回應監管機構的查詢」，決定叫停上市，到依家都未有再喺香港掛牌，百德醫療當日暗盤收市要跌，最後暗盤撤銷，當時有專家指不公平之餘，亦有輸打贏要之嫌。
去到2023年6月，百德醫療宣布計劃借殼SPAC(特殊目的收購公司)喺美國納斯達克上市，至2024年10月百德醫療終於喺納斯達克掛牌。
