【財經TOP SEARCH】叮咚對美團盈利貢獻唔大？

【Now財經台】截至早上11時止，過去1小時內《彭博》用戶搜尋量最多港股，依次為友邦保險(01299)、騰訊控股(00700)、泡泡瑪特(09992)、中國銀行(03988)及美團(03690)。

美團斥資逾7億美元，收購喺美國上市嘅叮咚買菜中國業務，擴大美團喺華東嘅即時零售佈局，現時阿里巴巴(09988)、京東集團(09618)等同類平台，喺內地冇自營前置倉模式即時零售平台，今次嘅收購會唔會進一步鞏固，甚至擴大美團內地前置倉嘅領導地位？

大華繼顯執行董事梁偉源表示，今次收購可提升美團競爭力，收購估值亦合理，叮咚正現金流亦為美團帶嚟幫助，加上協同效益，今次嘅收購係正常部署。

Steven直言，叮咚第3季盈利約8000萬人仔，估計對美團整體盈利貢獻唔大，亦未知最終令美團盈利有幾大改善，未來要留意收購完成後，新增前置倉可唔可以提升美團競爭力。