【專家分析】「春節紅包大戰」阿里贏面大

【Now財經台】仲有約兩星期就到馬年，內地各大平台嘅「紅包大戰」已經開打，百度集團(09888)早前已宣布推出5億人仔紅包計劃，騰訊控股(00700)旗下人工智能(AI)平台「元寶」更準備10億人仔現金紅包，阿里巴巴(09988)嘅「千問App」更豪掟30億人仔，大搞「新春請客計劃」，喺AI熱潮下，今年嘅特色係「AI+社交」，到底邊隻股份會成為「紅包大戰」大贏家？

高歌證券金融首席分析師聶振邦認為，單靠以往都有嘅搶紅包，對帶動整體消費作用唔大，但加入AI元素可以令市民有新鮮感，更可以間接推廣AI應用，例如用戶可以直接喺千問App買戲飛，變相增加咗消費入口，相信新元素對提升平台今個月嘅活躍用戶(MAU)有絕對幫助。

聶Sir又話，3大巨頭之中，大眾對阿里及百度嘅生成式人工智能(Gen AI)較熟悉，而騰訊嘅AI應用暫時同電腦編程關聯較多，喺今次活動入面可能稍為落後，由於阿里擁有商城同閃購等電商業務配合，喺帶動消費同業務推動上更有優勢，所以較睇好阿里，後市可以留意股價上半年可唔可以挑戰190至200元水平。