【Now財經台】截至早上11點,過去1小時內《彭博》搜尋量最多港股,依次為快手(01024)、華虹宏力(01347)、聯想集團(09992)、藥明生物(02269)及騰訊控股(00700)。
快手昨日(19日)出咗第3季業績,收入按年跌11%至316億人仔,經調整純利跌84%至7.9億人仔,主要受直播收入跌、研發開支升等因素影響,快手放榜後遭多家大行削目標價,股價今日(20日)一度急挫逾14%,低見19.73元,點睇快手前景?
大華繼顯執行董事梁偉源指,快手呢份業績令人失望,串流平台收入受大環境影響,商家拆帳時快手收少咗,令串流平台收入及毛利率一齊跌。
Steven又話,之前市場憧憬快手嘅「可靈AI」(Kling AI)有機會分拆,但依家大市氣氛較差,分拆就有啲困難,至少估值會低咗,所以分拆計劃對快手幫助唔大,又認為喺多方面夾擊下,前景係令人憂慮。
