【Now財經台】新世界發展(00017)宣布第4度供股,無論折讓幅度及比例都係歷來最大,市值今日(16日)一度縮至約75億元,今次大股東周大福企業會參與供股,算唔算有誠意?會唔會順勢私有化?此外,有散戶將今次大折讓供股同滙豐控股(00005)之前世紀供股相提並論,點睇後續發展?
《香港股票財技密碼》作者梁杰文指,新世界之前3次供股比例較細,供股後股價都回升,但今次「1供11」嘅大比例兼大折讓喺藍籌股中比較少見,投資者處境或比較尷尬。
Mike估計,私有化機會微乎其微,否則,根本唔使供股,今次龐大集資計劃或反映商業地產大環境疲弱,公司除債務問題,亦要面對還錢畀銀行嘅壓力,所以先要集資。
不過,佢認同大股東已展示誠意,相比直接配股令小股東被動攤薄,供股已畀到股東公平選擇權,加上大股東承諾全數參與供股,變相周大福注資新世界解決債務問題,亦願意擔任部分包銷商。
梁杰文又話,新世界今次供股主要係紓緩短期債務壓力,未必好似滙控嗰次咁易有碎股問題,關鍵在於投資者自身財力能否負擔,唔會排除股價會反彈,但仍要視乎本港樓市未來能否見底回暖。
