【信報財經新聞】今日恒指收報24797點，升877點或3.67%，大市全日總成交放大至3566億元，較上日2369億元多出五成，騰訊(00700)、小米(01810)、美團(03690)一片報復式反攻，更以接近全日高位作收市，表面睇鑊氣十足，久違了的旺市氣氛返咗嚟，3566億元成交，誰都會心動！
港交所買盤薄
但有兩點值得留意，第一港交所(00388)只升2.8%，全日成交38.29億元，比起騰訊241.69億元、小米的151.38億元或美團72.73億元，明顯跑輸成交亦不算多，大市一日爆上3500億元成交，指數彈近4%，理論上最受惠應該係港交所，但今日佢升得慢、買盤又薄，難道資金唔信港股後市可以持續旺勢？第二就係北水上午仍錄得淨流入，筆者當時亦覺得、本月3號北水大舉淨流入後、可以視作後續有來之勢，怎知外資大舉流入港股之時，北水就趁高沽貨，全日倒轉變成淨流走213億元，呢個動作似係趁反彈減倉，多過睇好港股轉勢。
留一份戒心
外圍氣氛確實鬆咗一截，10年美債回落到4.89厘，油價同樣一夜跌超8%，美股隔晚更升逾千點，但北水偏偏不願配合，長飛光纖光䌫(06869)今日再跌12.48%、中際旭創(03308)跌6.45%，北水今日係返過嚟，但留佢唔住，下午又大舉流出，當最應該受惠的港交所都升唔起，當最有話語權的北水都趁高位走，與其衝入去接貨，不如坐低睇多幾日，指數彈得急且成交大，唔代表3500億元可以延續到第二日，現時只係留一份戒心，唔係睇淡，靜觀其變係唔想喺高位替人接貨。
梁健雄
筆者未持有上述股票電郵:deon_leung_888@yahoo.com.hk
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
