【Now財經台】恒生指數今日(22日)低開逾百點後，一度跌逾3%或逾770點，低見22879點，迫近6月低位22518點，科指亦創逾兩年新低，依家恒指、科指9天RSI落到約21，半日沽空比率16%，高於15%警戒線，點解讀今輪跌浪？
元宇證券證監會持牌人士李偉傑指，港股自8月起已經行下降形態，但又未見傳出重大負面消息，最近企業開始派成績表，市場充斥一股審慎情緒，例如中國移動(00941)出完季績後，支大陰燭都嚇親班一眾收息投資者，嚟緊科企會陸續出業績，相信投資者情緒都比較保守。另一方面，市傳內地唔少民企老闆面臨補交稅項，所以好多企業都接連配股套現，估計喺用嚟交稅，佢又認為，港股依家缺乏利好消息帶動反彈。
Jason話，技術層面上，恒生指數23000點樓下沽壓唔算好大，唔排除會出現反彈，但都會係「彈得少、跌得多」嘅格局，加上今年熱炒嘅人工智能(AI)硬件、算力、雲基礎設施股，10月起跌幅驚人，市場要重新調配資金，依家傳統平台股、算力、收息股都要跌，下方支持位先睇6月低位，但如果短期冇力上返下降軌樓上，即23300點水平，港股尋底壓力或進一步加大。
