【Now財經台】蘋果公司(Apple Inc)供應鏈巨頭之一嘅藍思科技(06613)上周五(16日)收市後公布，計劃斥2500萬美元，收購人工智能(AI)服務器液冷零件商裴美高國際約60%股權，公司去年盈利表現唔錯，依家市盈率(PE)約14倍，市帳率(PB)約24倍，藍思PE則約18倍，PB僅1.45倍，點解PB相差咁遠？呢單收購幫到藍思業績幾多？
高歌證券金融首席分析師聶振邦指，藍思屬於輕資產產業，所以資產淨值唔太高，好多資金都係科研資本支出，但呢啲支出未必會全部歸返落資產入帳，所以開支反映唔到公司資產淨值較強嘅情況，加上，不斷做投入都係希望收入及盈利增速可以多啲，所以PE及PB反差會較大，如果公司未來嘅賺錢能力都持續地較高，PB差距應該會逐漸收窄。
聶Sir又指，雖然暫時對業績貢獻唔大，但點都會對收入有幫助，暫時來睇，目標公司今年收入增長應該都較可觀，但藍思科研開支較大，成本控制上尚有好大嘅進步空間，可留意收購後成本控制會否有改善，繼而提升盈利。
