【Now財經台】藍思科技(06613)以每股2.2元，較停牌前折讓逾45%，收購巨騰國際(03336)約3.33億股，佔已發股本27.81%，總代價7.34億元，出價亦較巨騰截至去年底止每股資產淨值折讓約40%。巨騰今日(19日)復牌股價急挫，一度瀉逾31%，低見2.79元，係咩原因導致股價插水？
天風國際李偉傑表示，巨騰喺停牌前報4.05元，而股價喺4月初只係約2元，之後可能畀「春江鴨」掃上4元水平，足足炒高約1倍，之後就停牌，大股東以每股2.2元賣股權畀藍思科技，可能最終個價同市場預期有落差，再睇早啲，巨騰個價其實仲殘，股價去年9月喺1.5元樓下。
Jason又話，巨騰由2023年開始持續蝕錢，依家轉一轉手畀藍思科技，睇下可唔可以帶嚟新嘅協同效應。由於藍思科技出價低過現價，令部分股東喺市場沽出去，導致股價今日顯著受壓都係合理。
