【Now財經台】截至早上11時止，過去1小時內《彭博》搜尋量最多港股，依次為泡泡瑪特(09992)、智譜(02513)、優必選(09880)、聯想集團(00992)、翰森製藥(03692)。
泡泡瑪特股價今日(20日)一度瀉5.7%，低見134元，創2025年4月以來新低，公司至今仍未確定業績發布時間，但出中期業績時，已見到公司收入增長出現失速情況，集團更表示，全年收入增長20%嘅目標應該做唔到，泡泡瑪特股價近期弱勢，係同咩因素有關？
復星國際資產管理投資經理李曉翀指，有兩個比較直接嘅因素，首先，集團最近有啲新產品未出，但喺二手市場已跌穿原本發售價，通常都會喺二手市場搶貨，亦會有溢價，佢認為係有少少遇冷，其次係去年第3季運營數據高速增長，年初討論去年業績時先有一個新指引，今年10月嘅運營數據一定差，因為按年面對一個咁高基數。
Andrew又指，如果出10月數據時，若公告有提及樂園嘅高頻數據，佢相信表現會幾好，因為fans好肯喺樂園消費，集團由IP運營到以IP為主銷售，再到樂園，如果營運做得好，會構成唔錯嘅商業閉環。
佢續稱，若股價喺高頻數據出爐後仍企得穩，可以慢慢做中長線部署，不過，若短期信心唔大，都係以慢慢收集為主，除非揸好重貨，運營數據又偏負面，才考慮減持。
