【Now財經台】截至早上11時止，過去1小時內《彭博》搜尋量最多港股，依次為聯想集團(00992)、騰訊控股(00700)、MiniMax(00100)、雅迪控股(01585)及智譜(02513)。
市傳聯想正尋求一筆20億美元嘅5年期貸款，雖然定價利差明顯低於2022年，息口負擔減輕對公司嚟講似乎係好事，但涉資20億美元，金額都唔細，點睇後市發展？
資深分析師曾永堅指，現時市場最擔心正正係呢類受惠於人工智能(AI)投資潮嘅股份，喺增加AI業務投資及資本開支時(CapEx)時，會唔會出現投資遠高於實質收益嘅情況，聯想依家增加大額貸款，自然會進一步放大市場上嘅憂慮。Jaseper又話，現時聯想股價回落至23.6至23.7元水平，預測市盈率(PE)降至介乎15倍至16倍，按未來設備、伺服器同個人電腦(PC)業務增長，預期仍可支撐到估值水平。
但長遠而言，關鍵在於投資可唔可以帶嚟高於成本嘅邊際效益，預期股價短期仍受環球憂慮而受壓，睇返技術走勢，若確認跌穿24元關口，後市或有機會下試更低水平。
