【Now財經台】今年7月上市嘅立訊精密(02475)近日公布，入主KFM金德(03816)及致豐工業電子(01710)，但兩隻股份復牌都要跌，KFM上周五(2日)復牌挫6%，今日(5日)繼續插水，致豐今日復牌表現更差，一度暴瀉逾87%，由蚊股慘變毫子股，最新跌約14%，點解兩隻股份會跌成咁？
《香港股票財技密碼》作者梁杰文指，咁短時間內收購兩隻殼股，情況都幾罕見，今次除咗攞多啲上市融資平台，亦可以理解為上下游業務整合，因為兩家公司業務都同立訊相符，可以產生協同效應。
至於點解兩隻股份復牌表現咁差，Mike認為，同港股近期表現比較差有關，恒生指數接連失守25000關及24000關，投資氣氛明顯轉差，當有公司宣布好消息及復牌，前期買咗貨嘅投資者，就心急借好消息出貨，由於市況差，所以一沽貨就推低股價，但佢認為唔意外，加上KFM及致豐股價近1年升得好誇張，投資者鎖定利潤亦無可厚非。
