【Now財經台】環球債市危機仍未完，市場又傳出英國可能加銀行稅，滙豐控股(00005)股價上周五(2日)急挫5%後，今朝(5日)一度再跌逾1%，低見147.6元，跌至3個月低位，今日有冇好友再入場博反彈？熱門CALL價外7%至8%、槓桿做到13至17倍，揀條款時有咩要留意？
中信證券國際股權衍生品銷售經理李碧珊指，市場擔心英國政府向銀行徵收暴利稅，滙控引伸波幅走勢同恒生指數、恒生科技指數唔同，尤其短年期場外期權明顯偏高，反映市場認為滙控短線風險較中長線高，上周五3個月場外期權引伸波幅約升1個波幅點，反映市場對相關不確定因素有所憂慮。
資金方面，滙控今早向下仍有資金入場博反彈，投資者可以留意較進取嘅條款，價外10%至20%，年期較短，槓桿約15倍。不過，部分輪價已跌至逾2仙，正股要升2、3格輪價先跳1格，買賣差價亦較闊，一旦睇錯方向，輪價進一步下跌，差價可能再擴闊。
