【Now財經台】截至早上11時止，過去1小時內《彭博》用戶搜尋量最多港股，依次為智譜(02513)、聯想集團(00992)、康方生物(09926)、MiniMax(00100)及希音(Shein)(00625)。
7月配售禁售期一過，智譜又再開「抽水機」，宣布折讓10%配股兼發可換股債券(CB)，籌近400億元，受消息拖累，智譜股價今日(14日)低開逾5%後，一度低見710元，大跌10%，更失守配股價。
富昌證券聯席董事譚朗蔚指，智譜股價今朝急挫，當然同配股消息有關，市場擔心公司咁快又「抽水」，係咪好等錢使，因為大模型公司要用好多資金，訓練大模型及研發新版本等，而遠因就係集團8月公布嘅業績仍然係蝕錢，加上行業競爭激烈，又好易被對手取代，所以引發市場憂慮。
佢又話，依家嘅配售價可能對好多投資者嚟講係一個寄望，不過，睇返之前阿里巴巴(09988)公布業績後配股，市場頭兩日好關注配售價，但股價跌咗落去之後都冇返過轉頭，反映弱市下AI投放嘅故事，市場短期都唔係好Buy，相信配售價就算今日守得住，之後都可能失守。佢提醒，喺依家呢個情況下，投資者唔好盲目貪平，又認為1000元仍然係後市非常大嘅反彈阻力。
