【Now財經台】截至早上11時止，過去1小時內《彭博》搜尋量最多港股，依次為希音(Shein)(00625)、快手(01024)、智譜(02513)、港交所(00388)、梅卡曼德機器人(09615)。
快手旗下主打影片生成嘅「可靈AI」(Kling AI)，獲國家人工智能基金及正大機器人分別注資14億人仔及1929萬美元，分別佔北京可靈擴大後註冊資本約1.14%及0.11%，究竟快手現時估值反映咗幾多可靈AI嘅價值？幫唔幫到快手修復估值？
復星國際資產管理投資經理李曉翀指，純粹計估值，可靈AI融後估值約184億美元，以快手喺可靈AI持股約68.3%計算，依家整體市值逾60%來自可靈，不過，若以傳統業務計，依家可以話冇計入可靈AI嘅估值，仍然都係一個負估值狀態。
Andrew又指，快手當然有本身嘅吸引力，但出咗第2季業績後，快手對可靈ARR(年度經常性收入)給出嘅第三季指引比市場預期差，可能按月近乎冇增長，相信係因為最近好多公司，包括字節跳動(ByteDance)及MiniMax(00100)，用自家人工智能(AI)模型製作AI劇，喺內地上映時收視都唔錯，都反映AI產業競爭愈來愈大，尤其AI影視方面，所以可靈AI下階段需交出比市場預期好嘅表現，又或者落實分拆，先可以大大刺激快手估值修復。
