【Now財經台】阿里巴巴(09988)自宣布世紀配股後，股價持續下滑，好倉累計有唔少資金流入，過去5個交易日，有4日錄得淨流入，合共有逾3800萬元資金坐貨，係好倉最多資金流入嘅個股輪證，阿里好倉博咗反彈幾日，但似乎都冇乜成果，但正股波幅收窄，今朝(31日)活躍CALL輪引伸波幅介乎40%至50%，資金有冇轉倉做牛證，甚至反手做淡？
中信證券國際股權衍生品銷售聯席董事李佳原指，今朝阿里引伸波幅上升，幅度亦較大，反映市場覺得阿里之前嘅引伸波幅或定價太低，不過，阿里仍守住配股價及50天線，反映市場對管理層增持股份反應正面。
由於美股軟件股表現較好，都有利阿里及騰訊控股(00700)等股份，呢啲消息可以令博反彈嘅投資者較安心。Sam又指，想依家博反彈嘅投資者，選擇較貼價嘅CALL輪會較合適。
