【Now財經台】體育用品股安踏體育(02020)今日(26日)中午出咗業績，中期多賺近35%，收入按年增長近13%，派息增10%至1.51港元，表現好過同業李寧(02331)、特步國際(01368)，點解安踏可以跑出？
元宇證券投資總監林嘉麒指，多品牌策略係安踏致勝關鍵，因為公司收購嘅外國品牌知名度較高，亦係較專業嘅運動品牌，高消費群未必會因為經濟狀況影響消費意欲，所以安踏盈利增長較同業標青。
KK又指，雖然其他品牌亦有做高端市場，但由於安踏收購嘅係國際知名品牌，唔太受內地經濟狀況影響，外圍經濟表現好、歐美消費意欲強等因素，都可能係安踏交到好業績嘅原因。
