【Now財經台】截至早上11時止，過去1小時內《彭博》搜尋量最多港股，依次為快手(01024)、 中國生物製藥(01177)、石藥集團(01093)、友邦保險(01299)及泡泡瑪特(09992)。
快手昨日(19日)第2季度派咗業績，「可靈AI」(Kling AI)營業收入按年大升逾2倍，但整體收入僅按年增長1.4%，毛利率更急跌，國內經營利潤按年跌近31%，海外更由盈轉虧。快手股價今日一度急瀉12%，低見33.2元，係咪因為呢份成績表差，又比唔到市場憧憬，導致股價喺大成交下插水？
香港股票分析師協會副主席曾永堅指，其實快手呢份季績都有亮點，其中，「可靈AI」表現好過預期，不過，上季業績已反映快手線上銷售及廣告收益放緩，加上下半年宏觀環境更具挑戰，市場擔心線上銷售及整體業績喺第3及第4季進一步收縮，係股價及估值受壓主因。
Jaseper續指，管理層指，對人工智能(AI)相關投入有增無減，但線上銷售及廣告持續面臨放緩壓力，因此，估計快手股價短期會繼續反覆受壓。
