【Now財經台】華住集團(01179)公布新一輪3年股東回報計劃，總額增至25億美元，較2024年嘅3年計劃加碼25%，上次公司有講明每半年派1次息，股息總額唔少於純利60%，又話考慮財政狀況後，會不定時派特別息或回購美國預託證券(ADR)，不過，今次只概括一句「會酌情決定派普通股息或特別息或回購ADR」，點睇新回報計劃？
元宇證券大中華區股票投資總監趙晞文指，從絕對值上睇，市場原本預期股東回報計劃總額，最多只會同上一輪20億美元持平，結果今輪有25億元美元，絕對係有驚喜。不過，3年前華住股價處於低位，當時用25億美元去派股息、做回購，甚至增持，效果都好顯著，不過，現時股價已被推高，喺高位做回購、增持等動作，實際作用有限，反而係公司恆常派息能維持最少60%，股東有現金盈利落袋會更好。
至於未來會唔會派特別息，佢認為，可以參考公司近年做法，上一次派特別息係2023年，但以近兩年經營狀況推斷，估計維持50%至60%派息比率完全冇問題。
