【Now財經台】停牌近兩年嘅華夏文化科技(01566)今日(17日)復牌，股價狂飆，午後升幅進一步擴大，一度高見2.06元，勁升逾3倍。公司可以成功復牌因為搵到救兵，債權人計劃生效，引入新主共生智築(00627)前主席Kenichi先生，佢持有嘅Kyosei bank，會認購集團新股，完成後，會持有擴大後股本約75%，成為控股股東。今日爆升後，下一浸係咪炒重組憧憬？新主背景對公司有幾大利好？
《香港股票財技密碼》作者梁杰文指，華夏文科之前主打遊樂設施，但受疫情影響，公司面臨極大危機，但之後成功完成債務重組。股份今日可以復牌，反映港交所(00388)認可公司重組計劃，甚至有新投資者認購可換股債券(CB)注入新資金，短期流動資產已多過負債，暫時冇資金壓力。
Mike又指，共生智築都經歷過清盤問題，所以Kenichi先生喺處理呢方面有經驗，今次應該係用同一個方法拯救公司，又認為新主決心好大，如果加埋CB，Kenichi先生持股量將達90%。
