【Now財經台】騰訊控股(00700)及京東集團(09618)出完業績後都要捱沽，其中，跌唔停嘅騰訊今日(14日)一度落到約3周低位，即436元，係咪市場都睇淡兩家公司前景？此外，日本、南韓、台灣股市回勇，但港股已暫時已連跌4日，短期係咪仍然偏弱？
冠域商業及經濟研究中心主任關焯照表示，大市方面，之前人工智能(AI)股帶動日韓台股暴升，由於港股較少AI股，所以當時港股就跌，韓股喺6月、7月去槓桿，導致爆股災更拖累日台股，資金就重投港股嘅重磅股，騰訊、阿里巴巴(09988)、滙豐控股(00005)等都可以受惠，依家日韓台股開始反彈，資金又流返過去，係一個換馬性質。
港股重磅科技股方面，關博士話，騰訊業績差過預期，資本開支(CapEx)太大令盈利受壓，雖然股價連日下跌，但已開始有企穩跡象。至於下星期出業績嘅阿里，股價開始調整及逐步回套，因為之前一度累升近50%，但因為就快放榜，資金開始流走，但估計業績唔會太差，又認為整體大市都開始企穩。
