【信報財經新聞】美國7月份生產物價增長放緩，加上國際油價下挫，帶動債息回落，美股周四造好，三大主要指數向上。道指高開58點後，升幅擴大至最多278點，高見54049，收市報53839，反覆回升69點或0.13%；標指升50點或0.65%，報7798，創即市及收市歷史新高，納指升214點或升0.81%，報26803。
重磅股中，Tesla收市股價升3.8%，蘋果及Meta分別反彈1%和2.8%，連日反彈嘅SpaceX則回吐3.3%；思科最新季度業績未能令投資者滿意，股價插水8.4%，為表現最差道指成份股；Salesforce抽高4.2%，為表現最好道指成份股。記憶晶片廠商閃迪(SanDisk)公布2028至2030財政年度業績預測強勁，股價急升13.7%。噚日都講咗資金好似重新流入AI算力、光通信同半導體股，果然呢堆股票又再落鑊。NBIS按計劃只賺咗，暫時未上返車。至於DELL就上過500樓上但企唔穩，個防守位推高少少去480再等下。INTC繼續等佢上去補裂口，防守位90暫時不變。至於MU又真係上得返50MA，可惜尚未企穩，900再追入嘅貨，個防守位推高少少去920。NVDA上返220企得穩，暫時望住前頂先，下方用208條20MA嚟做防守。
話咁快又到星期五，嚟到weekend前夕，阿Man都會懶散啲，噚晚跟返個NQ分水嶺29800，開市企咗就好倉，順利喺30200落車，今晚可以出街玩炒少一晚。至於今晚NQ個分水嶺上移至30100，支持係30000/29990/29800/29700，留意返NQ整個勢頭已改變，若然穿返29700條10MA就小心。阻力方面30200/30300/30400/30500，企到30300後市有條件挑戰前頂。
美國7月份生產物價指數(PPI)按年升幅由6月的5.5%放慢至4.7%，增幅低過預期的4.9%，按月維持不變，有別於估算增加0.2%，期內核心PPI按年增幅從6月的4.7%放緩4.2%，略高過預期升4.1%，按月增長0.2%，升幅少過原先預計的0.3%。聯儲局9月加息的機會從本周較早前50%左右，降至約35%，而且不再百分百押注年內調高利率。美國10年期債息曾降9.2個基點，報4.6厘，對息口較敏感嘅2年期債息跌7.3個基點，至4.126厘。
里士滿聯儲銀行總裁Tom Barkin表示，有跡象顯示通脹正回落，令聯儲局維持利率不變，但同時承認，如果供應鏈挑戰及人工智能(AI)相關投資熱潮持續，部分物價壓力或愈益扎根，最終可能迫使當局收緊政策。美滙指數一度跌0.21%，報99.8，日圓曾彈0.26%，報159.02兌每美元，其後輕微轉跌。彭博引述消息人士稱，日本高市早苗政府支持日本央行短期內加息，時間或於9月或10月。據悉，央行擔心日圓疲弱推高物價，政府希望強化最近美日聯手干預滙市效用，雙方達成一致加息立場。
AI股再鑊資金追捧，港股呢兩日又無運行，港股昨日低開152點，雖然開市已見全日低位，其後更一度升79點見25519高位，但可惜未能收復20日線，最終仍跌43點，報收25396，成交額則於騰訊(00700)放量下跌之下增至2637億元。緊接騰訊公布業績之後，京東(09618)亦公布季績，ADR股價急跌，拖累ADR及夜期回復跌勢，夜期跌逾百點，進一步下跌至25200水平，今早黑期亦於此水平徘徊，料今早大市低開逾百點。恒指低開177點，報25219，去到100日線之前見反彈，跌幅一度收窄至84點，高見25311，可惜條20MA連影都無，淡友又發功，中午收市前最多跌246點，低見25149。恒指中午收報25160，跌236點或0.93%，半日剛好跌穿咗條100MA，睇怕下半場有機會再做多個低位。大市半日成交1357.24億元，北水淨流入16.83億元，雖然北水噚日同今日都有買下貨，但買貨力度有限，暫時又失多一條移動平均線，死剩條50MA，係好友嘅最後一根稻草。
調整近月嘅AI算力、光通信及內存股份近日回升，資金再度追逐AI相關股份，流出老登股，難免對港股構成壓力。重磅科技股業績不僅未能為港股帶來支撐，反而騰訊及京東績後股價急跌，令港股下調壓力增加。本來幾條於日線圖正向上嘅移動平均線相繼失守，時區最短嘅5日線及10日線已開始回落，而一向俗稱牛熊分界線嘅250日線跌穿三個交易日無法修復，被視為好淡分界線嘅20日線亦已跌穿兩日，港股走勢由強轉弱，留意一旦跌破100日線及25000心理關口，料考驗24600-24700水平，亦即50日線24635之所在，亦為日線保力加道通底部不容有失。短線反彈阻力為20日線即25468，即25500水平，下一阻力為5日線及10日線即25600-25700水平，如恒指遲遲未能重返幾條平均線之上，則確認港股由6月低位反彈逾3000點嘅反彈浪結束，或再展開另新一輪跌浪。
麥狄文
(徐狄怡‧證監會持牌人)
