【Now財經台】騰訊控股(00700)將會喺明日(12日)派成績表績，但股價今日(11日)喺放榜前夕幾乎一跌到尾，曾低見469.6元，跌逾2.4%。騰訊第1季業績兩大焦點，即雲業務及資本開支(CapEx)增長，分別逾40%及63%，集團今年CapEx增長趨勢會係點？投資者喺業績前後又可以點部署？
元宇證券大中華區股票投資總監趙晞文估計，騰訊第2季CapEx會比第1季多，約500億人仔，估計上半年約800億人仔，全年就最少1600億人仔，都符合市場預期，又預期下半年CapEx投放節奏會比上半年更快，而開支點支撐雲業務擴張、收入嘅變現能力係咪成正比，都會係明日出爐嘅業績焦點。
投資部署方面，佢認為，由於市場對呢份業績已有一定預期，相信股價已經反映咗，如果有貨唔使等業績，可以趁高食糊先，不過，冇貨可以等出咗業績，睇下人工智能(AI)業務表現、變現路徑市場收唔收貨，因為當中有好大變數，所以等股價企穩再做部署會比較安全。
