【Now財經台】停牌逾兩周嘅國泰君安國際(01788)今朝(10日)復牌，股價一度狂飆逾37%，高見2.855元，集團獲大股東國泰海通(2611)提出以每股3元私有化，較停牌前有44%溢價，涉及約98億元現金，若私有化成功通過，集團將會撤銷上市地位，依家係咪大股東提私有化最好時機？出價市帳率(PB)約1.8倍，係咪物有所值？
《香港股票財技密碼》作者梁杰文指，純粹睇作價或香港證券業務，呢個出價唔係值，但對小股東及國泰君安國際嘅投資者就較公道，今次PB為1.8倍，高過唔少喺香港上市券商及部分內地券商，例如中信証券(06030)PB都係介乎1.3倍至1.5倍，國泰君安國際今次出價比整體行業估值貴。
Mike又指，國泰君安國際私有化時機，唔及2024年初海通國際(00665)私有化好，兩年前港股死氣沉沉，海通國際私有化作價得0.5倍PB，個價屬於「大平買」，所以國泰君安國際依家提出私有化就貴一大截。
