【Now財經台】市傳內地已開始向香港保單收益徵稅20%，保險股之中，今朝(6日)以友邦保險(01299)跌得最甘，裂口低開逾6%後，跌幅一度擴大至9%，低見70.6元。如果想做短線博反彈部署，揀邊類條款較好？正股跌得咁急，部署CALL輪有冇縮窩風險？
星展香港環球金融市場上市產品主管周國威指，其實友邦喺6月初已基於對內地政策嘅憂慮，股價已跌過一浸，由85元一直跌到70元樓下，所以今次呢個徵稅消息都唔係一個新消息，但今朝仍有一個較大跌幅。
佢又話，雖然有呢個負面消息，但友邦股價仍未跌穿前低位，投資者反而視為一個入場位，由於跌得咁急，牛證收回風險較難控制，所以唔少投資者揀CALL輪，現在入場可以考慮行使價75元、83元，價外逾10%，年底或明年初到期，如果做短線部署，宜小注博反彈。
